Besteforeldre: Gudrun og Sigvart

Gudrun og Sigvart

Sigvart Johan Kristoffersson
Fødd 1897 på Kinn,
Død 1977 i Florø
Far: Kristoffer Henriksson
Mor: Hanna Olsdotter

Gudrun Roberta Teodorsdotter
Fødd 1894 på Ytre Revøy (Korshamn) i Austad
Død 1967 i Florø
Far: Teodor Gabrielsson
Mor: Teresia Teisdotter

Sigvart og Gudrun er besteforeldre:

mor: Tordis (Sigvartsdtr.), Kinn 1931
morforeldre: Sigvart og Gudrun

*Korshavn vist i forhold til Lindesnes, Lyngdal og Farsund*

Gudrun vart fødd i Korshavn på Ytre Revøy i Lyngdal 21. november 1894. Ho vart døypt 26. november. Fadrane var faren, farbroren Adolf Gabrielsson, mostera Regine Teisdotter (Reinertsen) og hennar mann Sakarias Karlsson. Gudrun voks opp hos foreldra i Korshamn på Ytre Revøy. Ho hadde ei eldre syster, Teodora (Dora), og fekk fleire sysken seinare (sjå foreldra).

Innførsla i kyrkjeboka for Lyngdal då Gudrun blei døypt i 1894. Faren var «Søm.», sjømann, og Korshavn står som bustad.

Sigvart vart fødd på Neset (Vauleneset) på Kinn 18. juni 1897 og døypt 11. juli. Fadrane var Lyder Sunde, Rognaldsvåg (mannen til mostera Margrete), Tomas Andersson, Kinn (mannen til mostera Marie), Gina Berentsdotter Kinn (syskenbarn av faren) og den seinare mannen hennar, Fredrik Jakobsen frå Haugesund, og Anna M. Reksten. Sigvart voks på opp på Kinn, på Neset, hos foreldra. Ei tid budde òg farmora Bolette Tomasdotter der. Han hadde to eldre sysken, Henriette (Jette) og Olav, og seinare kom det fleire sysken (sjå foreldra). Sigvart reiste til Tacoma i Washington i USA 19. mai 1914. Fire av syskena til faren budde der. Det er uklart kor lenge han var i USA.

Gudrun kom i teneste i Bergen i det same huset som Sigvart si syster Borghild, hos tannlege Ingvar Henry Rolseth og kona Aslaug. Ved folketelinga i 1920 var Gudrun kokke og Borghild barnepike der; tannlegeparet hadde tre barn då. Der møttest dermed Gudrun og Sigvart ein gong då han skulle vitje systera.

Søskena til Gudrun
Teodora Teodorsdtr. (Dora), gift med Teodor Olsson, budde mest i Bergen. Dei kalla seg Wathle.
Trygve Teodorsson, gift med Jenny Karlsdtr., budde mest på Ytre Revøy i Lyngdal. Dei kalla seg Gabrielsen.
Eilert Teodorsson, gift med Solveig Mikaelsdtr., budde mest på Lundegård i Lyngdal. Dei kalla seg Sørodd.
Anton Teodorsson, gift med Jofrid Reinertsdtr., budde i Korshavn. Dei kalla seg Gabrielsen.
Amalie Teodorsdtr., gift med Sverre Reinertsson, budde i Farsund. Deik kalla seg Syvertsen.
Ragnvald Teodorsson, ugift, budde i New York. Han kalla seg Gabrielsen
Karl Teodorsson, gift med Birgit Karlsdtr., budde i Korshavn. Dei kalla seg Gabrielsen.
Margrete Teodorsdtr., gift med Torger Syvertsson, budde i Selør, seinare Korshavn. Dei kalla seg Knudsen.

Søskena til Sigvart
Henriette Kristoffersdtr. (Jette), gift med Lorents Larsson, budde på Kinn og i Florø. Dei kalla seg Skorpen.
Olav Jonas Kristoffersson, gift med Kari Magnusdotter Seim, budde på Kinn. Dei kalla seg Henriksen.
Aslaug Kristoffersdtr., døydde ung i Bergen.
Borghild Kristoffersdtr., gift med Anton Pedersson, budde på Kinn. Dei kalla seg Æsø.

Sigvart og Gudrun gifta seg i Kinn den 21. desember 1926. Forlovarar var hans eldre sysken: Olav Kristoffersson (Henriksen) og Henriette Kristoffersdotter (Skorpen).

Dei brukte slektsnamnet Henriksen.

*Torleif, Gudrun med Tordis på fanget, Hjørdis. Bildet er teke på Neset.*

Sigvart var fiskar, og dei første åra budde dei hos foreldra hans på Kinn. Der vart barna fødde. 10. oktober 1933 kjøpte Sigvart jord av Kyrkjedepartementet: bnr. 13 av gnr. 41 Indre Reksta. Prisen var 950 kroner. I 1934 fekk dei offentleg bureisingstilskot. Jorda ligg i Selvågen lengst aust på Reksta, og der rydda dei eit småbruk medan dei budde i ei skøyte på vågen. Dei eldste barna var med foreldra, men Tordis budde hos besteforeldra Kristoffer og Hanna på Kinn til ho skulle byrje på skulen på Reksta. Dei to siste åra av folkeskulen budde ho igjen på Kinn.

*Dei to småbruka i Selvågen ligg lengst aust på Reksta.*

Sigvart og Gudrun var småbrukarar og hadde hest, kyr, sauer, griser og høns. Ved sida av høy til fôr dyrka dei poteter og ulikt anna, under krigen korn òg. Ei tid hadde dei revefarm, mest sølvrev; denne var det mest sonen Torleif som dreiv. I tillegg til småbruket dreiv Sigvart fiske.

Før krigen var Sigvart noko med i styringa av Kinn herad. Ved lokalvalet i 1937 stod han på 7. plass på Samlingslista. Lista fekk inn seks representantar med Magne Eide på topp. Eide var lærar på Reksta skule, og han blei ny ordførar. Sigvart hamna på første varaplass, éi fattig stemme etter Erik Fester. Eide flytta frå Kinn i 1939, og då rykte Sigvart opp som fast vara. Han skulle ha sete til hausten 1941, men då hadde etter kvart lokalstyret blitt avvikla av dei Nasjonal Samling-kontrollerte styresmaktene.

*Gudrun, Sigvart, Tordis, Torleif og Hjørdis*

Gudrun lei av multippel sklerose og budde på aldersheimen i Florø den siste tida. Ho kom til å bryte hoftebeinet og døydde kort tid etter, 25. februar 1967, på Florø sjukehus i samband med ein operasjon. Ho blei 72 år gammal.

Brev til Gudrun frå søstera Dora: «Kjære søster Gudrun Idag Søndag må jeg få skrive nogle linjer til dig. Undres på vor dan det er med dig og vor dan du trives. Håper at det er bare bra og at du kommer hjem i gjen og er frisk. Vi får håpe på at denne turen gjør dig godt og at du trives. Nu …»

Torleif overtok garden etter faren tidleg på 1970-talet. Sigvart vart buande i Selvågen til han vart innlagd på Florø sjukehus med kreft. Der døydde han etter nokre veker, 30. juli 1977, 80 år gammal.

Barn og etterslekt

1927-12-17: Torleif Malvin. Døypt 25. mars 1928, fadrar: foreldra, Olav Kristoffersson Kinn og Henriette Kristoffersdotter Skorpen (søsken av faren). Torleif overtok garden på Indre Reksta (Selvågen) i Flora etter foreldra. Han var ugift og hadde ikkje barn. På slutten av livet budde han i Florø. Han døydde 31. mai 2006.

1929-09-12: Hjørdis Konstanse. Døypt 30. mars 1930, fadrar: Henriette Kristoffersdotter Skorpen (søster av faren), Kari Magnusdotter Kinn (svigerinne av faren), Anton Pedersson (framtidig svoger av faren), Robert Hermansson Kinn. Hjørdis var gift med Alfred (Reksten) Sælemyr frå Selvågen. Dei budde på Indre Reksta (Selvågen), seinare i Florø. Dei hadde ikkje barn. Alfred døydde 18. februar 2003. Hjørdis døydde 8. desember 2012.

Alfred si aneliste: 1. Alfred; foreldre: 2. Nils Pedersson f. Indre Reksta 1901, 3. Olga Amanda Kristoffa Ludvigsdotter f. Sunnarvika 1901; besteforeldre: 4. Peder Johan Nilsson f. Follevåg i Askvoll 1858, 5. Anne Marie Birgitte Martinsdotter f. Indre Reksta 1872, 6. Ludvig Daniel Olsson f. Sunnarvika 1875, 7. Marie Sofie Salomonsdotter f. Bergen 1875; oldeforeldre: 8. Nils Pedersson f. Follevåg i Askvoll 1827, 9. Birte Katrine Johannesdotter f. Andalen 1830, 10. Martin Olai Henriksson f. Indre Reksta 1842, 11. Anne Birgitte Lydia Arentsdotter f. Sunnarvika 1843, 12. Ole Ananias Simonsson f. Sunnarvika 1831, 13. Oleanne Marie Johansdotter f. Svardalen 1842, 14. Salomon Martin Gunelius Henriksson f. Via i Førde 1845, 15. Anne Sofie Juditte Valentinsdotter f. Engebøen i Naustdal 1843; tippoldeforeldre: 16. Peder Johannesson Gjerde (Askvoll), 17. Karen Pernille Jonasdotter Kvalstad, 18. David Johannes Jonasson Kvalstad, 19. Ingeborg Berentsdotter Andal, 20. Søren Henrik Mortensson Indre Reksta, 21. Nille Olsdotter Hennøy (Bremanger), 22. Arent Hartvig Sørensson Hovland, 23. Anne Marie Andersdotter Sunnarvik, 24. Simon Olsson Svarthumle, 25. Anne Kirstine Johannesdotter Ausevik, 26. Johan Olsson Fossen (Bremanger), 27. Birte Susanne Matsdotter Svardal, 28. Henrik Salomonsson Hellenes (Naustdal), 29. Kristiane Olsdotter Via (Førde), 30. Valentin Andreas Olsson Engebø (Naustdal), 31. Anne Berentsdotter Byrkjeflot (Førde).

1931-12-06: Tordis. Tordis er mor. Ho skal få sin eigen post.