Kinn-historie

Arent og Anne Marie

Arent og Anne Marie er 2xtipp-oldeforeldre langs to linjer fordi Otto og Tordis begge var ætta frå dottera deira. Dette er vist i figuren:

Arent var fødd i mars 1798 på Hovland i Eikefjorden og voks opp der med to eldre søsken (Torstein og Anne) og ein yngre bror (som truleg heitte Mons). Foreldra Søren og Oline var gardfolk. Arent miste mora då han var om lag sju, faren tre år seinare.

Anne Marie var fødd i juli 1800 i Sunnarvika i Eikefjorden, der foreldra Anders og Katrine var gardfolk. Ho voks opp der med ein eldre bror (Anders) som truleg døydde liten, og tre yngre søstrer (Elen, Anne Katrine og Birte).

Arent og Anne Marie gifta seg den 2. juli 1822, 24 og 22 år gamle, og busette seg i Sunnarvika.

I 1829 kjøpte Arent det bruket i Sunnarvika som far til Anne Marie hadde bygsla. Dei fekk åtte barn, men den første sonen døydde liten.

Sonen Abraham overtok garden som eigar i 1849, men i kassebøkene til futen står Arent som brukar og skattebetalar til 1856.

Anne Marie døydde i Sunnarvika 31. januar 1857, 56 år gammal. Arent døydde 14. desember 1861, 63 år gammal. Sju barn levde etter dei.

Barn og etterslekt etter Arent og Anne Marie

1823-01-04: Søren Ananias. Søren døydde i 1823.

1824-03-31: Abraham Olai. Abraham vart gift i 1850 med Hille Marie Olsdotter fødd på Lykkjebøen i 1828 med foreldre Ole Olsson og Helene Sørensdotter, begge frå Lykkjebøen. Abraham og Hille budde i Sunnarvika. Barn: Anne Marie, tvilling med Helene (1850), Arent Hartvig Olai (1853), Oleanne Elen Marie (1855), Anne Sofie Oline (1857), Ole Andreas Rasmus (1859), Anders Johannes (1861), Samson Matias (1863). Abraham døydde i 1864. Ved folketeljinga i 1865 budde enkja i Sunnarvika med alle barna unnateke Anne Sofie Oline. To brør av Abraham budde der: Ole Mikal var losjerande og Salomon tenestekar. Ved folketeljinga i 1900 var Hille kårenkje i Sunnarvika. Salomon losjerte hos henne. Likeins var det i 1910, og då hadde dei ei fosterdotter, Helene Andersdotter (f. 1876 i Kinn). Dei budde på garden til son hennar, Arent.

1826-11-27: Anne Sofie. Sofie vart gift i 1851 med Karsten Olai Hermansson, broren til Susanne sin mann Ole Mikal. Sjå 2xtipp-oldeforeldre Herman og og Ales.

1830-03-09: Ole Mikal. Ole Mikal fekk ei dotter, Anne Marie, utanfor ekteskap i 1864. Mora var Ingeborg Kristiansdotter, som tente på Vasset. Ho var fødd i 1839, truleg i Eimhjellen i Gloppen av ugifte foreldre: Kristian Nilsson Eimhjellen og Anne Bersveinsdotter Heggdal (Stryn?). Ved folketeljinga i 1865 var Ole Mikal ugift og var losjerande fiskar hos Hille Olsdotter, enkja etter broren Abraham. Han kjøpte jord på Hovland i 1866. I 1867 gifta han seg med enkja Anne Sofie Matsdotter. Ho var frå Hovland, men hadde vore gift i Svarthumla. Dei budde på Hovland i 1900; Ole Mikal var bøkkar og kårmann. Anne døydde i 1903. Ole Mikal døydde på Hovland i 1912.

1833-04-27: Salomon Matias. Ved folketeljinga i 1865 var Salomon tenestekar hos Hille Olsdotter, enkja etter broren Abraham. I 1900 losjerte han framleis hos henne. Han var ugift snikkar. Likeins i 1910, då han mellombels var i Høydalen. Han døydde i Sunnarvika i 1911.

1836-04-22: Susanne Bolette. Susanne er tippoldemor, Sjå Tippoldeforeldre: Ole Mikal og Susanne.

1840-08-20: Anne Katrine Birgitte. Ved folketeljinga i 1865 var Katrine i teneste i Sunnarvika. I 1866 vart ho gift med sonen i huset, Abraham Matias Matsson. Abraham var fødd i Sunnarvika i 1841 med foreldre Mats Arnesson (frå Å i Gloppen) og Pernille Mikkelsdotter (truleg frå Rauset i Gloppen). Abraham døydde i Sunnarvika alt i 1866 og Katrine fekk ein son i 1867: Abraham Matias (1867). I 1869 vart ho gift for andre gong, med Ole Mikal Danielsson. Han var fødd i Batalden i 1840 med foreldre Daniel Gregoriusson (frå Terøya) og Lise Olsdotter (frå Skorpa). Ole Mikal og Katrine budde i Batalden, truleg på Fugløya. Barn: Didrik Andreas (1869), Arent Olai (1871), Lydia Alette (1875). Katrine døydde på Fugløya i Batalden i 1888 og etterlét seg mann og felles barn. Ole Mikal døydde i 1920.

1843-11-26: Anne Birgitte Lydia. Lydia fekk ei dotter, Andrea Marie, utanfor ekteskap i 1862. Ho budde då på Reksta. Faren var Torgeir Toresson, fødd på Knapstad i 1842 med foreldre Tore Arnesson (frå Nyttingneset) og Karoline Torgeirsdotter (frå Svarthumla). Ved folketeljinga i 1865 var Lydia i teneste på Indre Reksta, og i 1866 vart ho gift med sonen i huset, Martin Olai Henriksson. Han var fødd på Indre Reksta i 1842 med foreldre Henrik Mortensson (frå Indre Reksta) og Nille Olsdotter (frå Hennøya). Barna til Martin og Lydia: Nille Marie (1866), Henrik Andreas (1867), Abraham Olai (1870), Anne Marie Birgitte (1872), Nille Henrikke (1874), Arent Ananias Hartvig (1877).  I 1875 flytta Lydia og Martin med døtrene Anne Marie Birgitte og Nille Henrikke til Hosanger, dvs. Lindås eller Osterøy i Hordaland. Dei må ha komme tilbake etter kort tid, sidan dei fekk ein son på Reksta i 1877.  Martin døydde i 1898. I 1900 sat Lydia som enkje på Indre Reksta. Likeins i 1910, i Kalvemarka på Indre Reksta hos sonen Arent og familien. Ho døydde i 1916.