Kinn-historie

Anders og Trone

Anders og Trone er tippoldeforeldre:

• far: Otto (Albertsson), Kinn 1924
• farfar: Albert Tomasson, Kinn 1889
• farfars far: Tomas Andersson, Kinn 1858
• farfars farforeldre: Anders og Trone

Anders var fødd på Indre Reksta 24. november 1821 og vart heimedøypt 2. desember av Mats K. Tomasson Indre Reksta. Dåpen blei stadfesta i kyrkja 13. januar 1822. Fadrane var då Mattis Matsson Ytre Reksta, Arne Knutsson, Torstein Markvardsson, Birte Sakariasdotter og Massi Matsdotter, alle frå Indre Reksta.

Anders voks opp hos foreldra Bjørn og Malene, som var gardfolk på Indre Reksta. Han hadde tre eldre halvsøsken (Henrikke, Tomas og Oline) frå faren sitt første ekteskap, og ei eldre og ei yngre fullsøster (Andrea og Sara Oline).

Trone var fødd på Flora 22. februar 1829, truleg på Brendøya, og vart døypt 15. mars. Fadrane var Øystein E. Gadden, Lars G. Andal, Hans J. Krokane, Eli Sd. Flora, Olave Rd. Andalsvåg.

Trone voks opp hos foreldra Elias og Inger på Flora, truleg på Brendøya, som ligg under prestegarden (Øvre Flora). Ho hadde to eldre fullsøsken (Andreas og Anne) og ei tretti år yngre halvsøster (Juditte) frå faren sitt tredje ekteskap. Mora døydde det året Trone blei 12 år.

Søskena til Anders
Henrikke, gift med Ole Didriksson Fester frå frå Flora/Rognaldsvågen, budde på Ytre Reksta.
Tomas, gift med Pernille Matiasdtr. frå Espeset på Askrova, budde på Kinn.
Oline, gift med Mats Pedersson frå Jonstad i Naustdal, budde m.a. på Kvalstad på Svanøya og på Espeset på Askrova.
Andrea, ugift, budde på Kinn og på Ytre Reksta.
Sara Oline, ugift, døydde på Flora.

Søskena til Trone
Andreas, ugift, budde på Flora.
Anne, gift med Samson Olsson frå Sunnarvågen, budde på Flora.
Juditte, gift med Kristoffer Olsson frå Barekstad, budde i Minneapolis i Michigan i USA.

Anders gifta seg med Oline Susanne Olsdotter 26. mars 1850. Dei var 28 og 22 år gamle. Forlovarar var Elias Karstensson Flora (den seinare svigerfaren hans!) og Knut Bendiksson Krokane.

Oline var fødd 11. august 1827 i Øvrebotnen i Bremanger. Foreldra var Ole Olsson frå Øvrebotnen og Anne Oline Eliasdotter frå Stavøya i Flora. Ved ekteskapet budde både Anders, Oline og foreldra hennar på Stavøya.

Anders og Oline budde på Stavøya til ho døydde 24. august 1851 av nervefeber (tyfoidfeber), berre 24 år gammal. Dei fekk ein son saman.

Anane til Oline: 1. Oline Susanne Olsdotter f. Øvrebotnen 1827; foreldre: 2. Ole Olsson f. Mardal (Gloppen) 1800, 3. Anne Oline Eliasdotter f. Stavøya 1802; besteforeldre: 4. Ole Olsson Devik (Gloppen) 1770, 5. Kristi Nilsdotter Mardal ca. 1763, 6. Elias Akselsson f. Stavøya 1772, 7. (Ide) Malene Andersdotter f. Storøya 1777; oldeforeldre: 8. Ole Jakobsson Devik, 9. Agnete Ellevsdotter Eikenes, 10. Nils Andersson Austreim, 11. Ales Olsdotter Apalset., 12. Aksel Larsson, 13. Sara Einarsdotter, 14. Anders Olsson, 15. Bente Ivarsdotter.

Anders og Trone gifta seg 18. juni 1854. Dei var 32 og 25 år. Forlovarar var far hennar og Samson Olsson Flora.

Anders var då busett på Kinn, og dei vart buande der, under Likhaugane. Dei fekk ikkje mindre enn 12 barn saman. Fire av dei døydde som spedbarn, men åtte voks opp.

Ved folketeljinga i 1865 hadde dei hans son Berent og dei felles barna Olai, Ludvig, Tomas og Oleanne. Anders var husmann. Det står i teljinga at dei hadde fire storfe; skulle det vere fire sauer? Dei sette 1/2 tønne poteter. Ved folketeljinga i 1875 budde barna Ludvig, Tomas, Oleanne, Marie, Amalie og Andreas hos dei. Dei hadde ei ku, eit ungnaut og fem sauer. Dei sådde ikkje noko. Sonen Berent var fiskar og innerst hos dei. Han hadde kona Oline Jakobsdotter og dottera Olufine Marie.

Anders vart av Sorenskrivaren i Sunnfjord i 1876 dømd for å ha stole ein sau og eit lam frå Johan Andreasson Rognsøy i april 1875. Straffa var ti dagar på vatn og brød og sakskostnader på 28 riksdaler til sakførarane.

Anders drukna ved kollsigling 22. mars 1882, visstnok ved Hestøya i Skorpefjorden. Han vart 60 år gammal. Samtidig drukna òg Jonas Henriksson Kinn (dotterson av Anders sin halvbror Tomas Bjørnsson Kinn) og visstnok hans far Henrik Olsson Kinn.

Trone vart buande hos sonen Tomas under Likhaugane. Ved folketeljinga i 1891 budde ho der, med Tomas og kona Marie, dei tre eldste barna deira (Olufine, Albert og Teodor), sine eigne døtrer Oleanne og Hanna, og Oleanne sin son Adolf.

Ved folketeljinga i 1900 var ho mellombels hos dottera Amalie på Lille Damsgård i det som no er Bergen. I 1910 budde ho hos Tomas på Kinn. Trone døydde på Kinn 20. mai 1914, 85 år gammal.

Barn og etterslekt etter Anders og Oline

1850-04-09: Berent Matias. Berent gifta seg med Oline Jakobsdotter Knapstad i 1875. Dei to og dottera Olufine emigrerte til USA i 1878. Ved den amerikanske folketeljinga i 1880 budde dei i Canoe i Winneshiek county i Iowa (eit stykke nordaust for Decorah). Han er kalla Bernt Anderson. Dei hadde då tre døtrer. Berent var gardsarbeidar. I 1900 budde dei same stad; han var «farmer» og kalla Bernet Anderson, ho var kalla Caroline. Hos seg hadde dei to søner og ei dotter, og mor til Oline, Nille Torgeirsdotter (Nellie Anderson) budde òg der. Berent døydde i Winneshiek i 1921, Caroline i 1926. Barna til Berent og Oline/Caroline: Olufine Marie Andrea, kalla Josephine, fødd på Kinn 1875, g.m. Ole Christian Johnson frå Vestre Toten, to søner og tre døtrer, budde i Canoe og seinare i Decorah, død 1947. Anne Oline Juditte (Anna) skal ha vore fødd i Sarpsborg 1878, g.m. Robert Walter Smith frå Hesper i Winneshiek, ein son, budde for det meste i Hesper, død 1922. Nellie Marie Bertine (Nel), fødd i Winneshiek 1880, uklart om ho var gift, budde i Minneapolis. Maud Judith Miller, fødd i Winneshiek 1882, g.m. Ernest Harrison Turner frå Red Willow i Nebraska, mange barn, budde i Victoria og seinare Edmonton i Alberta i Canada, død 1954 i Vancouver i British Columbia i Canada. Frederick Oliver Miller, fødd i Winneshiek 1883, g.m. Fay Marie Mosher frå Deadwood i South Dakota i USA, budde i Edmonton i Canada, i Sisseton i South Dakota (ei dotter fødd der), i King County i Washington i USA, seinare i San Diego i California, død 1965. Adolph Matias, fødd i Winneshiek i 1892, d. 1902. Minnie Thorina Serina, fødd i Winneshiek i 1894, g.m. Nels O. Opheim frå Allamakee i Iowa (namnet er frå Ulvik i Hardanger, der farfaren kom frå), fem barn, budde i York og Jamestown i Virginia i USA, ei tid i Florida, død 1990 i Williamsburg i Virginia.

Anane til Oline: 1. Oline Karen Sofie Jakobsdotter f. Knapstad 1854; foreldre: 2. Jakob Andreas Andersson f. Solheim i Gloppen 1823, 3. Nille Marie Torgeirsdotter f. Svarthumla 1816; besteforeldre: 4. Anders Simonsson, 5. Oline Olsdotter, 6. Torgeir Pedersson f. Svarthumla 1773, 7. (Birte Oline) Mari Olsdotter f. Lykkjebøen 1779; oldeforeldre: 8.–11. ?, 12. Peder Torgeirsson, 13. Kari Andersdotter, 14. Ole Olsson, 15. Lisbet Mortensdotter.

Barn og etterslekt etter Anders og Trone

1853-12-01: Olai Andreas. Olai vart i 1871 dømd for to tilfelle av tjuveri frå krambua til Lene Kinnesund, saman med to andre ungdommar frå Kinn. Første gongen hadde dei stole knapt ein spesidalar, andre gongen ein del bladtobakk. Dei vart dømte til fengsel og erstatning. Olai fekk 32 dagar på vanleg  fangekost og måtte saman med hine betale 1 dalar og 16 skilling tilbake til krambueigaren, Karsten Salomonsen i Eikefjorden. Olai budde ved folketeljinga i 1875 på Napp i Flakstad (Lofoten). Han var ugift tenestedreng. I 1883 fekk han ei dotter utanfor ekteskap med Hanna Charlotte Andreasdotter på Ballstad i Vestvågøy. Han døydde som ugift fiskar seinare same år på Buksnes sjukehus. Han var då busett på Ballstad og var kalla Olai Berg Andreassen. Andreassen er nok berre feil, men kor han fekk namnet Berg frå, veit eg ikkje (kort for Klingenberg?). (Hanna Andreasdotter blei gift i 1884 med Hans Jakobsson og busett i Reine, i 1900 enkje på Skotnes, i 1910 enkje i teneste på Balstad, i 1920 gift igjen med urmakar Henrik Matsson Engström frå Sverige.) Dottera til Olai og Hanna: Karen Antonette Olaisdotter Berg (f. 1883) var tenestejente på Skotnes i Vestvågøy i 1900. Fekk sonen Karsten Schjeldrup Arctander (1904‒61) med Karl Arctander; Karsten blei bakar busett i Kabelvåg, gift med Astrid Marie Jensen). Karen gifta seg med Kristian Olsson i Sulitjelma i 1909, i teneste der i 1910. I 1920 var dei busette i Kabelvåg med hennar son og ei pleiedotter frå Trondheim; Kristian var linefiskar. Karen død i Kabelvåg i 1972.

Anane til Hanna: 1. Hanna Charlotte Petrine Andreasdotter f. Kjuklingdal i Vestvågøy 1859; foreldre: 2. Andreas Nilsson f. Bergsdalen i Vestvågøy ca. 1808, 3. Karen Petrike Helene Jakobsdotter f. Svarholt i Vestvågøy ca. 1827; besteforeldre: 4. Nils Andersson, 5. ?, 6. Jakob Halvorsson, 7. ?. (Kyrkjebøker manglar for fleire tiår tidleg på 1800-talet, så det er vanskeleg å komme bakover.)

1856-05-03: Ludvig Johan. Ludvig vart dømd for grovt og simpelt tjuveri i 1873 og for innbrotstjuveri i 1875. Det siste var òg broren Tomas med på. Dei sat i Bergen tukthus 1875–76. Ved skiftet etter fastera i 1885 (sjå ovanfor) reiste han til sjøs frå England. Han emigrerte til Australia og vart statsborgar der i 1906. Han budde i Ballina i New South Wales. I 1913 gifta han seg med Eliza Emeline Agnes Corbett f. Hyland (f. 1875 i Newtown i New South Wales). Han døydde i 1920. Ho levde til 1955.

1858-02-25: Tomas Elias. Tomas er oldefar, sjå Oldeforeldre: Tomas og Marie.

1860-01-13: Oline Susanne. Oline døydde 12. mars 1860, knapt tre månadar gammal.

1861-01-20: Salomon Andreas. Salomon Andreas døydde 28. januar 1861, åtte dagar gammal.

1862-01-13: Salomon. Salomon døydde 17. januar 1862, fire dagar gammal.

1863-01-26: Nille Oleanne. Oleanne var i teneste på Flokenes i Askvoll ved skiftet etter fastera Andrea i 1885 (sjå ovanfor). Ho fekk ein son utanfor ekteskap i 1890, då busett på Kinn; far til guten var skomakarsvein Johannes Monsson frå Bergen. Ved folketeljinga i 1900 er ho kalla Anna Klingenberg og var kokke og stuepike hos ein hamnekontrollørfamilie på staden Skår på Andenes i Andøy (Nordland). I 1910 var ho tenestejente hos systera Marie i Alsvåg i Øksnes. Ho var ugift og brukte Klingenberg som etternamn. I 1920 var ho i teneste på ein gard i Alsvåg. Sonen til Oleanne og Johannes: Adolf Berthold (f. 1890), fosterson hos mostera Marie og hennar mann Martin (sjå nedanfor). Gift 1918 med Inga Henriette Olsdotter frå Nyksund i Øksnes som døydde same året. Gift igjen 1922 med Anna Rakel Andreasdotter frå Jukkasjärvi i Sverige, busette i Alsvåg, mange barn. Adolf døydde i 1962.

1865-04-06: Andreas Johan. Denne Andreas døydde 20. april 1865, to veker gammal.

1866-06-07: Marie Juditte. Marie gifta seg i Kinn prestegjeld i 1886 med Martin(us) Jansson Helle, fødd på Kvalheim i Radøy. Ved folketeljinga i 1900 budde Martin og Marie i Alsvåg i Øksnes (Vesterålen). Dei var fosterforeldre til hennar søster Oleanne sin son Adolf Johannesson (sjå ovanfor), og dei hadde ei fosterdotter, men ikkje eigne barn. Dei levde av fiske. Ved folketeljinga i 1910 budde dei framleis i Alsvåg. Dei var husmanns- og fiskarfolk. Tenestejente hos dei var hennar søster Oleanne, og hennar som Adolf budde òg der (fiskar og jordarbeidar). Dei budde i Alsvåg i 1920 òg, og der budde Adolf og ei pleiedotter.

Anane til Martinus: 1. Martinus Jansson f. Kvalheim i Radøy 1859; foreldre: 2. Jan Johannesson f. Nordre Sæle i Øygarden 1825, 3. Magdeli Olsdotter f. Rossland i Meland 1827; besteforeldre: 4. Johannes Ludvigsson frå Bergen f. ca. 1802, 5. Johanne Jonsdotter frå Alvheim i Øygarden f. ca. 1802, 6. Ole Mikkelsson frå Åsebø (i Meland?) f. ca. 1785, 7. Marte Johannesdotter frå Rossland i Meland.

1869-10-31: Amalie Tomasine

Amalie gifta seg i Laksevåg prestegjeld i 1897 med Sakarias Nilsson frå Laksevåg i Bergen. Ved folketeljinga i 1900 budde Sakarias og Amalie på Lille Damsgård i Bergen. Dei hadde då to søner, og Trone, mor hennar, var mellombels der. Sakarias var reipslagarsvein. I 1910 budde dei på same stad (eit hus med seks husstandar), og Sakarias var framleis reipslagarsvein. I 1920 budde dei i Damsgårdsallmenningen 7; Sakarias var lausarbeidar. Barna til Amalie og Sakarias: Alfred Nikolai f. 1897, g.m. Sigvarda Konstanse frå Laksevåg, sonen Valter f. 1920, i 1920 busette same stad som foreldra hans, han var målarsvein.  Trygve Berntin f. 1899, levde i 1910. Borghild f. 1901, hos foreldra i 1920, butikkjomfru. Agnes Sofie f. 1902, hos foreldra i 1920, arbeidde på fabrikk. Olav Martin f. 1905, hos foreldra i 1920, støyperilærling. Oskar August f. 1909, hos foreldra i 1920.

Anane til Sakarias: 1. Sakarias Nilsson f. Laksevågneset (no i Bergen) 1864; foreldre: 2. Nils Andreas Nilsson f. Smådal i Naustdal 1829, 3. Berte Serene Sakariasdotter f. Hola (el. Holen, Laksevåg, no i Bergen) 1831; besteforeldre: 4. Nils Nilsson frå Haus f. ca. 1790, 5. Marte Sofie Gunnarsdotter f. Smådal i Naustdal 1792, 6. Sakarias Rasmusson f. Stranda (Laksevåg, no i Bergen) 1790, 7. Berte Kristiane Åmundsdotter f. Nygård (Laksevåg, no i Bergen); oldeforeldre: 8.–9. ?, 10. Gunnar Matsson, 11. Marte Olsdotter, 12. Rasmus Andersson, 13. Ingeborg Sakariasdotter, 14. Åmund Gabrielsson, 15. Karen Kirstine Johannesdotter.

1872-04-04: Andreas Johan. Andreas gifta seg i Bergen i 1893 med Anna Monsdotter frå Njåstad i Osterøy.  Ved folketeljinga i 1900 budde dei i Øvre Sandviksvei i Bergen. Dei hadde då tre søner og ei dotter. Andreas var skomakarmeister. I 1910 budde dei i Møllesmuget 2 (forhus). Andreas var skomakarsvein. Dei hadde desse barna hos seg: Barrat (1895, d. Bergen 1964), Eyvind (1896), Alf (1899), Marie (1900), Anna (1903), Johan (1905), Erling (1908), Astrid (1909). Kona Anna døydde i 1919. Andreas levde i 1922. Barrat blei konditormeister i Bergen.

Anane til Anna: 1. Anna Monsdotter f. Njåstad i Osterøy (Haus prestegjeld) 1865; foreldre: 2. Mons Eriksson f. Njåstad 1826, 3. Marta Johannesdotter f. Låstad i Osterøy (Haus) 1830; besteforeldre: 4. Erik Monsson f. Njåstad 1786, 5. Brita Johannesdotter f. Loftås? i Osterøy (Haus) ca. 1785, 6. Johannes Jakobsson f. Låstad/Loftås 1806, 7. Siri Johannesdotter f. Presttun i Osterøy (Haus) 1808; oldeforeldre: 8. Mons Eriksson, 9. Anna Olsdotter, 10.–11.?, 12. Jakob Halvorsson, 13. Marta Johannesdotter, 14. Johannes Monsson, 15. Kari Jonsdotter.

1876-10-29: Hanna Oline Katrine. Hanna ser ikkje ut til å ha vorte konfirmert. I folketeljinga frå 1900 er ho kalla «Hanna Andersdatter Klingenberg». Ho budde då som legdslem i Trettevika i Flora. I rubrikken for sjukdom står det «Aa», dvs. åndssvak. Eg finn henne ikkje i 1910, så ho var vel død då.